images
images
  • पूर्वसभामुखमाथि लागेको चर्चित बलात्कार प्रकरणकी पीडित महिलाले गरिन् आत्महत्या

    काठमाडौं । भक्तपुरको सूर्यविनायक नगरपालिका–३ बालकोटस्थित बृहस्पति मार्गमा ५० वर्षीया रोशनी शाही मृत अवस्थामा फेला परेकी छन् ।

    तीनतले घरमा डेरा गरी बस्दै आएकी शाही आइतबार दिउँसो १ बजेर ५० मिनेटको समयमा आफ्नै कोठाभित्र मृत फेला परेको जिल्ला प्रहरी कार्यालय भक्तपुरका एसपी माधव बुढाथोकीले जानकारी दिए ।

    उनका अनुसार कोठा भित्रबाट चुकुल लगाइएको अवस्थामा शाहीको शव फेला परेको हो । घटनास्थलमा सुसाइड नोट पनि फेला परेको छ ।

    शाही पूर्वसभामुख कृष्णबहादुर महरामाथि लागेको चर्चित बलात्कार प्रकरणकी पीडित हुन् । सो मुद्दामा महरा अदालतबाट सफाइ पाएका थिए ।

    प्रहरीका अनुसार शाहीको स्थायी घर जाजरकोट हो । उनका छोराछोरी विदेशमा छन् भने श्रीमान् हाल उपत्यका बाहिर कार्यरत रहेका कारण उनी घरमा एक्लै बस्दै आएकी थिइन् ।

    प्रहरीले शव पोस्टमार्टमका लागि शिक्षण अस्पताल महाराजगञ्ज पठाएको छ भने घटनाबारे थप अनुसन्धान भइरहेको जनाएको छ । प्रारम्भिक अनुसन्धान अनुसार उनको शरीरमा कुनै बाह्य चोटपटक देखिएको छैन ।

    शाहीको मृत्युसँगै केही समयअघि बन्द भएको एउटा चर्चित मुद्दा पुनः सार्वजनिक बहसको विषय बन्ने संकेत देखिएको छ ।

    प्रतिक्रिया दिनुहोस्
    images
    images