images
images
  • किचकबधमा भेटियो महाभारतकालीन दरबारको जग

    झापा : भद्रपुर नगरपालिका- ३ स्थित किचकबधस्थलमा ​पुरातात्त्विक महत्वको ‘दरबारको जग’ भेटिएको छ

    पुरातत्वविद् उद्धव आचार्यको नेतृत्वमा पुरातत्व विभागबाट आएको चार सदस्यीय टोलीले यही फागुन २५ गतेदेखि किचकबध स्थलमा उत्खनन तथा संरक्षणको कार्य निरन्तर गरिरहेको छ।

    विभागका अधिकृत नवराज अधिकारीले किचकबध स्थलमा २०५८ देखि विभागले आचार्यको नेतृत्वमा उत्खनन गरिरहेको बताए। उनका अनुसार यो पटक जारी उत्खननका क्रममा तीन मिटरभन्दा गहिरो जग र केही प्राचीन सामग्री भेटिएका हुन्। भेटिएको जगको इँटाहरू विगतमा फेला परेका इँटासँग मिल्दोजुल्दो छ।

    ‘यसपटक हामीले केही नयाँ ठाउँमा उत्खनन गरेका थियौँ”, पुरातत्वविद् आचार्यले भने, ‘विगतमा उत्खनन हुँदा फेला परेका प्राचीन संरचनाहरूको संरक्षणमा बढी ध्यान दिएका छौँ।’ उनका अनुसार विगतमा भएको उत्खननबाट २२०० वर्ष पुरानो दरबारको सुरक्षा पोस्ट, पर्खाल र कम्पाउन्डसहितको भौतिक संरचना भेटिएको थियो। त्यसबेला मानिसले प्रयोग गर्ने भाला, बाण र माटाका भाँडासमेत फेला परेपछि त्यसलाई पुरातत्त्व विभागले संरक्षण गर्दै आएको छ।

    १० बिघा क्षेत्रमा फैलिएको किचकबध स्थलमा पछिल्लो समय मानव निर्मित मन्दिर, पोखरी र अन्य भौतिक संरचना बनाइएका कारण प्राचीन महत्त्वका संरचना तथा वस्तुहरु नष्ट हुने जोखिम छ। विभागले नयाँ संरचनाहरू जथाभावी रूपमा नबनाउन आग्रह गर्दै आएको छ। विगतमा खनजोत गरेर खेतीपातीसमेत गरिएका कारण कतिपय पुरातात्त्विक महत्त्वका वस्तु नष्ट भएको विभागको आशङ्का छ।

    गत वर्ष विभागले एउटा मन्दिर हटाउन लगाएको थियो। सोही मन्दिरमुनि यो पटक उत्खनन गर्दा प्राचीन दरबारको जग भेटिएको छ। अझै केही दिन उत्खनन र संरक्षणको कार्य जारी रहने विभागका अधिकृत अधिकारीले जानकारी दिए।

    पुरातत्वविद् आचार्यले किच्चकबध स्थलमा फेला परेका प्राचीन वस्तुहरूको बेलायतमा नमुना लगेर कार्बन टेष्ट गर्दा २२ सय वर्ष पुरानो पुष्टि भएको बताए। प्राचीन स्मारकका बारेमा आठौँ चरणसम्मको उत्खननबाट कुनै लिखित सामग्री भने फेला नपरेको उनले जानकारी दिए।

    ‘यहाँ हामीले भेटाएका सामानहरू २२ सय वर्ष पुरानो बास्तुकला, सभ्यता र संरचनाको प्रमाण भएको पुष्टि भइसक्यो’, उनले भने, ‘सानो कम्पाउन्डसहित सुरक्षा पोस्ट र हात्ती घोडालाई लगाइदिने सामान पनि भेटिएका छन्। यी कुराले यो स्थान प्राचीन धरोहर हो भन्ने प्रमाणित हुन्छ।’

    किंवदन्तीअनुसार महाभारतकालीन राजा विराटको ‘किच्चक’ नामका सालो थिए। जहाँ उनको दरबार थियो। पाँच पाण्डव गुप्तबास बसेका बेला द्रौपदीमाथि कुदृष्टि राखेका कारण भीमसेनले विराटनगरदेखि लखेटेर किचकलाई यही दरबारमा ल्याएर बध गरेका थिए। त्यहीकारण यस स्थानलाई किचकबध स्थल भनिन थालेको हो।

    सरकारले किचकबध स्थलको पौराणिक तथा पुरातात्विक महत्व धेरै भए पनि उत्खनन तथा संरक्षणका लागि पर्याप्त लगानी गर्न सकेको छैन। थोरै बजेट भएका कारण उत्खनन र संरक्षणको कार्य हरेक वर्ष अधुरो हुने गरेको छ।

    सरकारले उत्खननका लागि यो पटक १० लाख बजेट छुट्याएको विभागका अधिकृत अधिकारीले बताए। ‘बजेट धेरै हुने हो भने एकै वर्षमा धेरै काम हुन्थ्यो’ उनले भने, ‘तैपनि सीमित स्रोतसाधन हुँदाहुँदै दैनिक १३ जनासम्म कामदार लगाएर यसपाली संरक्षणको काम गरिरहेका छौँ।’

    प्रतिक्रिया दिनुहोस्
    images
    images