विश्व खबर 
काठमाडौं – दशेभर रहेका भाटभटेनी सुपरमार्केटका भवनको छतबाट साढे १२ मेगावाट बिजुली उत्पादनका लागि भाटभटेनीले सम्झौता गरेको छ ।
भाटभटेनी र रिन्यु होल्डिङ्स प्रालीबीच भाटभटेनीका विभिन्न सुपर मार्केटहरूको छत तथा खाली स्थानहरूलाई उपयोग गरेर १२ दशमलव ७५० मेगावाट बराबरको सौर्य विद्युत् उत्पादन तथा सहकार्यका लागि सम्झौता भएको हो ।
समझौतापत्रमा भाटभटेनीको तर्फबाट सञ्चालक सावित्री गुरुङ र रिन्यु होल्डिङ्सको तर्फबाट प्रबन्ध निर्देशक किरणकुमार श्रेष्ठले हस्ताक्षर गरेका छन् ।
रिन्यु होल्डिङ्सले सोलर, हाइड्रो लगायतका नेपालको नवीकरणीय ऊर्जाका साथै चार्जिङ् स्टेसन र नवीकरणीय ऊर्जासम्बन्धी नवीनतम प्रविधिमा काम गर्ने लक्ष्य लिएको छ ।
भाटभटेनीले देशभर २७ वटा सुपरमार्केटको स्थापना गरिसकेको छ भने अबको ५ वर्षमा ५१ वटा स्टोर स्थापना गर्ने लक्ष्य लिएर अघि बढेको छ । भाटभटेनीका सबै संरचनामा नवीकरणीय ऊर्जा प्रयोगमा जोड दिइनेछ ।
यस सम्झौताले नेपालमा नवीकरणीय ऊर्जा क्षेत्रको प्रवर्द्धन र दिगो विकासमा महत्त्वपूर्ण भूमिका खेल्नेछ भने कार्बन उत्सर्जनलाई पनि कम गर्ने विश्वास दुबै कम्पनीले लिएका छन् ।
‘गो ग्रिन’ अन्तर्गत आगामी पुस्तालाई सचेत गराउनका लागि सौर्य उर्जामा लाग्न खोजिएको भाटभटेनीका सञ्चालक मीनबहादुर गुरुङले बताएका छन् ।
नेपालमा रुफटप सोलारको प्रयोग खासै नभएको बेलामा भाटभटेनीले सुरु गरेको यो अभियानले रुफटप सोलारको माग बढ्ने अपेक्षा पनि गरिएको छ ।
प्रतिक्रिया दिनुहोस्