विश्व खबर 
काठमाडौं । भारतमा चक्रवाती आँधी दानाको चेतावनी जारी गरिएको छ । बिहीबार पश्चिम बंगाल र ओडिशाको तटमा पुग्ने बताइएको छ । भारतीय मौसम विज्ञान विभागले दाना आँधीबारे जानकारी दिदै आँधीले गत राति घातक चक्रवाती आँधीको रुप लिएको छ र विगत ६ घण्टादेखि १२ किलोमिटर प्रतिघण्टाको गतिमा उत्तर–पश्चिम दिशामा सरेको बताएको छ ।
उक्त आँधीको प्रभाव नेपालको कोशी प्रदेशमा पनि पर्ने मौसम विदहरुले बताएका छन् । भारतको जस्तै ठूलो प्रभाव नपरेपनि कोशी प्रदेशका धेरै जसो ठाउँमा वर्षा हुने विभागको अनुमान छ ।
भारतमा भने सम्भावित जोखिम कम गर्न धेरै मानिसहरुलाई सुरक्षित स्थानमा सारिएको छ । विद्यालय बन्द गरिएको छ भने उद्दार टोलीलाई हाइ अलर्टमा राखिएको छ ।
दाना आँधी अहिले मध्य र उत्तर–पश्चिम बंगालको खाडीमा ओडिशाको पराद्वीपबाट २६० किलोमिटर दक्षिण–पश्चिममा रहेको छ । उत्तरपश्चिमबाट उत्तरी ओडिशा र पश्चिम बंगालतर्फ सर्ने सम्भावना रहेको विभागले बताएको छ ।
आँधीको चेतावनीपछि पश्चिम बंगाल सरकारले नौ जिल्लाका सबै विद्यालय बन्द राख्न निर्देशन दिएको छ । जिल्ला प्रशासनले माछा मार्नेहरुलाई समुन्द्रमा नजान आग्रह गरेको छ । समुन्द्रमा गएका मछुवाहरुलाई फिर्ता बोलाइएको छ । तटीय क्षेत्रमा माइकमार्फत सर्वसाधारणलाई सचेत गराइएको छ ।
त्यस्तै ओडिशाको प्रसिद्ध पर्यटकीय गन्तव्य पुरीबाट मंगलबार पर्यटकलाई बाहिर निकालिएको छ । प्रदेशका १४ जिल्लाका सबै विद्यालय २३ गतेदेखि २५ गतेसम्म बन्द रहनेछन् । दानालाई ध्यानमा राख्दै राष्ट्रपति द्रौपदी मुर्मूको भ्रमण पनि स्थगित गरिएको छ ।
भुवनेश्वर मौसम केन्द्रका अनुसार भूमिपतन प्रक्रिया पाँच घण्टासम्म चल्नेछ । १२० किलोमिटर प्रतिघण्टाको रफ्तारमा तुफान आडिशाको उत्तरी क्षेत्रमा जानेछ । तटीय क्षेत्रमा २० सेन्टिमिटरसम्म वर्षा हुन सक्नेछ । ओडिशाका १४ जिल्लामा १० लाख मानिसलाई अन्यत्र सारिएको छ । त्यस्तै भुवनेश्वर र कोलकाताका दुई विमानस्थलमा आज साँझ ५ बजेदेखि भोलि बिहान ९ बजेसम्म करिब १६ घण्टा ३०० फ्लाइट स्थगित रहने छन् ।
त्यस्तै साउथ इस्ट रेलवले १५०, इस्ट कोस्ट रेलवेले १९८, इस्टन रेलवेले १९० तथा साउथ इस्ट सेन्ट्रल रेलवेले १४ रेल रद्द गरेको छ । कुल ५५२ रेल रद्द भएका छन् । पुरीको जगन्नाथ मन्दिर परिसरमा सबै अस्थायी टेन्ट हटाइएको छ ।
प्रतिक्रिया दिनुहोस्