विश्व खबर 
काठमाडौँ । अख्तियार दुरुपयोग अनुसन्धान आयोगले सुरक्षण मुद्रण केन्द्रका तत्कालीन कार्यकारी निर्देशक विकल पौडेलका परिवारको सम्पत्तिसमेत जफत गर्न माग गरेको छ ।
भ्रष्टाचार गरेको आरोपमा पौडेलविरुद्ध विशेष अदालतमा दायर भएको भ्रष्टाचार मुद्दामा अख्तियारले उनका बाबुआमा र श्रीमतीको नाममा रहेको सम्पत्ति जफत गर्न माग गरेको हो । अख्तियारले पौडेलमाथि ६२ करोड १९ लाख १८ हजार ६८४ रुपैयाँ २९ पैसा गैरकानूनी रूपमा सम्पत्ति आर्जन गरेको अभियोग लगाउँदै बुधवार अदालतमा मुद्दा दायर गरेको छ ।
अख्तियारले पौडेलसहित उनकी श्रीमती एलिना बस्नेत, बाबु धर्म प्रसाद शर्मा पौडेल र आमा शितल पौडेललाई सम्पत्ति जफत गर्ने प्रयोजनका लागि प्रतिवादी बनाउँदै विदेशी बैंकमा समेत रहेको सम्पत्ति जफत गर्न माग गरेको हो । गैरकानूनी सम्पत्ति आर्जन गर्ने कार्यमा उनीहरूले सहयोग गरेको नभेटिए पनि गैरकानूनी रूपले आर्जन गरेको सम्पत्तिबाट आफ्नो नाममा नगद, जिन्सी, सवारी साधन, घरजग्गा खरिद गरी राखेको देखिएकोले उक्त सम्पत्ति जफत गर्न मागदावी गरिएको अख्तियारका प्रवक्ता नरहरि घिमिरेले बताए ।
कसको नाममा कति सम्पत्ति ?
विकल पौडेल र एलिना बस्नेतको नाममा युनाइटेड ओभरसिज बैंक, सिंगापुर र बैंक अफ अमेरिका नेशनल एसोसिएसन, अमेरिकामा रकम जम्मा हुँदाको प्रचलित विनिमय दर अनुसार २८ करोड ९५ लाख ७५ हजार छ सय ८९ रुपैयाँ ७३ पैसा जम्मा रहेको पाइएको छ ।
एलिना बस्नेतको नाममा जम्मा रहेको रकमसमेत अमेरिकामा रहेको बैंक अफ अमेरिका नेशनल एसोसिएसनमा एलिना र विकलको संयुक्त खातामा सिंगापुरमा रहेको बैंकोटेक प्रा.लि.बाट सिधै रकम दाखिला भएको हुँदा उक्त रकममाथि उल्लेखित कानुनी व्यवस्था बमोजिम बिगो जफत तथा असुल उपर गर्न अख्तियारले मागदावी गरेको छ ।
विकल र एलिना पति–पत्नी रहेको र एलिनाको नामको अमेरिकाको घर खरिद गर्न विकलले एक करोड ५२ लाख ७० हजार सात सय ४० रुपैयाँ रकम गिफ्टको रूपमा एलिनालाई दिएको अख्तियारले जनाएको छ । उक्त घर सम्पत्ति विवरणमा सुरुदेखि नै नदेखाई लुकाई छिपाई राखेको एवं एलिना आयोगले गरेको तामेली म्यादमा अनुपस्थित रहेकी थिइन् ।
घर खरिद गर्दाको बाँकी रकम चार करोड ४२ लाख ६२ हजार तीन सय ६० साठी रुपैयाँको सम्बन्धमा कुनै स्रोत खुलाउन नसकेको अख्तियारले जनाएको छ । घर खरिदको बाँकी रकम विकलले गैरकानूनी रूपमा आर्जित रकम नै प्रयोग भएको अख्तियारले जनाएको छ । अख्तियारले तत्कालीन विनिमय दर अनुसार घर खरिदमा प्रयोग भएको छ करोड पाँच लाख ३३ हजार एक सय रुपैयाँसमेत कानूनी व्यवस्था बमोजिम बिगो जफत तथा असुल उपर गर्न मागदावी गरेको छ ।
विकलले गैरकानूनी रूपमा आर्जन गरेको गैरकानूनी सम्पत्तिबाट नै आमा शितल पौडेलको नाममा घर जग्गा र बाबु धर्म प्रसाद शर्मा पौडेलको नाममा विभिन्न कम्पनीको शेयर तथा सवारी साधनमा लगानी गरेको अख्तियारले जनाएको छ । उनीहरूको नाममा रहेको सात करोड ३१ लाख ८८ हजार नौ सयको सम्पत्ति जफत तथा असुलउपर गर्न अख्तियारले मागदावी गरेको छ ।
यसै गरी विकलले बकस पत्र लिएको शितल र धर्मका नाममा रहेको सम्पत्ति भाइमा अंशबन्डा हुनु अघि नै खरिद गरेको पाइएको छ । तर, आमा शितलले अंशबन्डा पश्चात् एकल छोरा विकललाई मात्र शेषपछिको बकस पत्र गरी दिएकी थिइन् । २०७९ भदौ २९ मा बकस पत्र गरी दिएको पाइएको हो । उनीहरूका दुई सन्तान विकल र विवेक रहे पनि बकस पत्र विकलको नाममा मात्र गरी दिएको पाइएको हो ।
शितलले बयानमा दाजुभाइमा आफूले गरेको कमाइको विषयमा पछि समस्या नहोस् भनेर शेषपछिको बकस पत्र गरेको भनी खुलाएकोबाट उक्त सम्पत्ति विकलले नै गैरकानूनी आर्जन गरी आमाको नाममा लगानी गरी सिर्जित सम्पत्ति भएको पुष्टि भएको अख्तियारले जनाएको छ । अनुसन्धान चलिरहेका अवस्थामा २०८० वैशाख २० को लिखतबाट शेषपछिको बकस पत्र बदर भएको मालपोत कार्यालय र उल्लेखित कित्ताका घर जग्गाहरू खरिद गरेको खर्च रकमका सम्बन्धमा शितलले वैध आय हो भन्ने प्रमाण पेस गर्न सकेकी छैनन् । गैरकानूनी रूपले आर्जन गरेको सम्पत्ति लगानीबाट नै खरिद गरेको देखिएको भन्दै अख्तियारले एक करोड ७० लाख मूल्यको जग्गा जफत/असुल उपर गर्न मागदावी लिइएको छ ।
एलिना र धर्म प्रसादको नाममा नेपालका बैंक तथा वित्तीय संस्थामा रहेको बैंक मौज्दात ११ लाख ६५ हजार नौ सय १२ रुपैयाँ ९२ पैसा पनि जफत/असुल गर्न अख्तियारको मागदावी छ ।
