विश्व खबर 
काठमाडौ –कहिलेकाहीँ आफ्नो परिवारको सदस्य नभए पनि, आफ्नो जन्मदेशको नागरिक नभए पनि, आफ्नो भाषा र संस्कृति नमिले पनि, कसैले अरूको पीडालाई यति गम्भीरतापूर्वक लिइदिन्छ कि ऊ आफ्नै परिवारको सदस्यजस्तै लाग्न थाल्छ।
म्याथ्यु स्वीट भर्जिनियाको प्रिन्स विलियम काउन्टी, मनासस र मनासस पार्क क्षेत्रका डेपुटी कमनवेल्थ्स अटर्नी अर्थात् सरकारी वकिल हुन्। हाल चर्चित ममता काफ्ले हत्या मुद्दामा उनी अभियोजन पक्षको नेतृत्वदायी भूमिकामा रहेर काम गरिरहेका छन्। ममताको शवसमेत फेला नपरेको यो जटिल मुद्दामा प्रमाणहरूलाई एकआपसमा जोड्ने, साक्षीहरूका बयान प्रस्तुत गर्ने र अदालतमा अभियोजन पक्षको तर्क स्पष्ट रूपमा राख्ने जिम्मेवारी उनले निर्वाह गरिरहेका छन्। विशेषगरी अदालतमा नरपिचास नरेश भट्टसँग उनले गरेको कडा सामना, सोधेका सटीक प्रश्नहरू र सत्यतथ्य बाहिर ल्याउन देखाएको दृढताले धेरै नेपालीहरूको ध्यान खिचेको छ। उनको काम हेर्दा मलाई लाग्छ, सरकारी वकिल हुनु केवल एउटा जागिर होइन, न्यायप्रतिको ठूलो जिम्मेवारी पनि हो।
ममता आज हामीमाझ छैनन्। एउटी आमाले आफ्नी छोरी गुमाएकी छन्। एउटा सानो बच्चाले आमाको माया गुमाएको छ। एउटा परिवारले आफ्नो संसार गुमाएको छ। अनि संसारभरका नेपालीहरूले यो घटनालाई आफ्नै परिवारमा परेको पीडाजस्तै महसुस गरेका छन्। यस्तो परिस्थितिमा म्याथ्यु स्वीटले देखाएको मेहनत, तयारी, धैर्य र दृढता हाम्रो समुदायका लागि ठूलो आशाको आधार बनेको छ। भोलि अदालतको फैसला के आउँछ, त्यो न्यायालय र जुरीको विवेक तथा प्रस्तुत प्रमाणमा निर्भर छ।
तर एउटा कुरा आजै भन्न सकिन्छ। फैसला जे आए पनि म्याथ्यु स्वीट र उनको अभियोजन टोलीले यस मुद्दामा गरेको मेहनत, समय र समर्पणप्रति हाम्रो सम्मान कम हुने छैन। हामीले चाहेको फैसला आउँदा मात्र धन्यवाद दिने र नआउँदा सबै योगदान बिर्सिने संस्कार हुनुहुँदैन।
न्यायको प्रक्रिया निष्पक्ष होस्, सत्यतथ्यको उचित मूल्याङ्कन होस् र पीडित परिवारले न्याय पाओस् भन्ने हाम्रो साझा चाहना हो।
प्रिय म्याथ्यु स्वीट, तपाईंले नेपाली समुदायलाई ठूलो गुण लगाउनुभएको छ। तपाईंले ममताको परिवारको पीडालाई गम्भीरतापूर्वक लिएर आफ्नो व्यावसायिक जिम्मेवारी निर्वाह गरिरहँदा हजारौँ नेपालीहरूले तपाईंको कामलाई नजिकबाट हेरिरहेका छन्। तपाईंको मेहनतले ममताको परिवारलाई मात्र होइन, न्यायको प्रतीक्षामा रहेका हामी सबैलाई आशा दिएको छ। आज पीडा, आक्रोश, निराशा र अनिश्चितताका बीच तपाईं नेपाली समुदायका लागि एउटा अँध्यारो बादलमा देखिएको आशाको चाँदीको घेरा( बन्नुभएको छ। हामी तपाईंलाई कुनै विशेष फैसला दिलाउन दबाब दिन होइन, तपाईंले इमानदारीपूर्वक निर्वाह गरिरहनुभएको जिम्मेवारीको कदर गर्न चाहन्छौँ।
मेरो व्यक्तिगत तर्फबाट र यस्तै भावना राख्ने सम्पूर्ण नेपाली समुदायको तर्फबाट तपाईंलाई हृदयदेखि धन्यवाद। म्याथ्यु स्वीटसँगै यस मुद्दामा खटिएका सरकारी वकिलहरू, अनुसन्धानकर्ता, प्रहरी अधिकारीहरू र न्यायका लागि निरन्तर आवाज उठाउने सबैप्रति पनि उत्तिकै सम्मान छ।
प्रशन्न संग्रोलाको फेसबुक वालबाट
