विश्व खबर 
काठमाडौं – बलिउडको चर्चित चलचित्र शृङ्खला ‘मुन्ना भाइ’को तेस्रो भाग बन्ने भएको छ । निर्देशक राजकुमार हिरानीले लामो समयदेखि चर्चामा रहेको ‘मुन्ना भाइ ३’ को तयारी अघि बढाएका छन् । चलचित्रको पटकथा लेखन अन्तिम चरणमा पुगेको बताइएको छ ।
भारतीय लेखक तथा पटकथा लेखक फरहाद सामजी अहिले चलचित्रको स्क्रिप्ट लेखनमा व्यस्त छन् । उनी यसअघि पनि ‘मुन्ना भाइ एमबीबीएस’ चलचित्रसँग जोडिएका थिए । उक्त चलचित्रको लोकप्रिय गीत ‘म बोले तो’ को मुखडा लेख्ने काम पनि सामजीले नै गरेका थिए ।
सामजीको ‘मुन्ना भाइ’ शृङ्खलासँगको सम्बन्ध एउटा रोचक घटनाबाट सुरु भएको थियो । एक अन्तर्वार्तामा उनले संगीतकार अनु मलिकले राति करिब १० बजे फोन गरेर भोलिपल्ट निर्देशक राजकुमार हिरानी र निर्माता विधु विनोद चोपडासँग हुने संगीत सत्रका लागि गीतको मुखडा तयार पार्न भनेको सम्झिएका थिए ।
त्यतिबेला चलचित्रको मुख्य भूमिकाका लागि शाहरुख खानलाई विचार गरिएको थियो । त्यसैले गीतमा पात्रको सडकछेउको बोलिचाली शैली र अभिनेताको पर्दामा स्थापित छविबीच सन्तुलन मिलाउनुपर्ने चुनौती थियो । पछि मुन्ना भाइको भूमिकामा सञ्जय दत्त चयन भए । सामजीले लेखेको गीत चलचित्रको लोकप्रिय पहिचानमध्ये एक बन्यो ।
पटकथा चित्त नबुझेसम्म चलचित्र नबनाउने हिरानीको अडान
निर्देशक राजकुमार हिरानीले ‘भ्याराइटी इन्डिया’सँगको कुराकानीमा ‘मुन्ना भाइ’ शृङ्खलाको अर्को भाग निर्माण गर्ने विषयमा छलफल गरेका थिए । उनले चलचित्र विकासको चरणमा रहेको बताउँदै पटकथा आफूलाई चित्त नबुझेसम्म सिक्वेल निर्माण अघि नबढाउने स्पष्ट पारेका थिए ।
यही कारण चलचित्रको पटकथा लेखनमा फरहाद सामजीलाई सहभागी गराइएको हो। शृङ्खलालाई नयाँ दृष्टिकोण र रचनात्मक शैली दिन सक्ने लेखकको खोजीमा हिरानीले सामजीसँग सहकार्य गरेको बताइएको छ ।
सामजीले हिरानीलाई आफ्नो आदर्श निर्देशक मान्दै आएका छन् । उनीहरूबीच यसअघि पनि विभिन्न रचनात्मक परियोजनामा सहकार्य भएको छ ।
२००३ बाट सुरु भएको लोकप्रिय यात्रा
सन् २००३ मा प्रदर्शनमा आएको ‘मुन्ना भाइ एमबीबीएस’ले सञ्जय दत्त र अरशद वारसीलाई मुन्ना भाइ र सर्किटका रूपमा दर्शकमाझ लोकप्रिय बनाएको थियो । हास्य, मानवीय संवेदना र सामाजिक सन्देशको मिश्रण रहेको चलचित्रले दर्शकको मन जितेको थियो ।
यसको सफलतापछि सन् २००६ मा ‘लगे रहो मुन्ना भाइ’ प्रदर्शनमा आएको थियो । दोस्रो भागमा मुन्ना भाइ र सर्किटका पात्रलाई महात्मा गान्धीका सिद्धान्तसँग जोड्दै नयाँ कथावस्तु प्रस्तुत गरिएको थियो ।
त्यसयता तेस्रो भाग निर्माण हुने चर्चा पटक–पटक हुँदै आए पनि पटकथा र कथावस्तुमा चित्त नबुझेका कारण परियोजना अघि बढ्न सकेको थिएन ।
सन् २०२७ मा छायाङ्कन गर्ने तयारी
पटकथा लेखन अन्तिम चरणमा पुगेको र छिट्टै पूरा हुने अपेक्षा गरिएको छ । सबै तयारी योजनाअनुसार अघि बढेमा चलचित्रको छायाङ्कन सन् २०२७ मा सुरु गर्ने लक्ष्य राखिएको बताइएको छ ।
यद्यपि चलचित्रको औपचारिक प्रदर्शन मिति, कलाकारको अन्तिम सूची र निर्माण तालिकाबारे विस्तृत घोषणा हुन बाँकी छ । सञ्जय दत्त र अरशद वारसीका लोकप्रिय पात्र मुन्ना भाइ र सर्किटलाई फेरि पर्दामा हेर्न दर्शकले लामो समयदेखि प्रतीक्षा गरिरहेका छन् ।
