विश्व खबर 
काठमाडौं- नेपालले अर्को सातासम्म नयाँ सरकार पाउने भएको छ ।
निर्वाचन आयोगका प्रवक्ता नारायणप्रसाद भट्टराईका अनुसार प्रत्यक्षतर्फको मतगणना सकिएलगत्तै समानुपातिकतर्फको मतगणना सुरु भएको छ । समानुपातिकतर्फको मतगणना तिब्र गतिमा भइरहेको छ ।
उनी भन्छन्, ‘आगामी तीन दिनभित्र समानुपातिकतर्फको पनि सम्पूर्ण मतगणना सम्पन्न हुने अनुमान छ ।’
भट्टराईका अनुसार त्यसपछि बाँकी कार्य अगाडि बढ्नेछ । समानुपातिकतर्फको मतगणना सकिएसँगै सम्बन्धित दलले पाएको मतका आधारमा सांसद संख्या चयनको प्रक्रिया अगाडि बढ्नेछ ।
सांसद संख्या चयनका लागि दलहरूलाई तीन देखि चार दिन समय लाग्ने अनुमान आयोगको छ । त्यसपछि दलहरूको संसदीय दलको बैठक बस्छ र संसदीय दलको नेता चयन हुन्छ ।
राष्ट्रिय स्वतन्त्र पार्टी ९रास्वपा०ले एकल सरकार बनाउने गरी स्पष्ट बहुमत ल्याएकाले रास्वपाले चयन गर्ने संसदीय दलको नेता नै प्रधानमन्त्री हुनेछन् ।
चुनाव अगाडि नै बालेनलाई भावी प्रधानमन्त्रीको रुपमा प्रस्तुत गरिएकाले उनकै नेतृत्वमा नयाँ सरकार बन्ने रास्वपाका नेताहरू बताउँछन् ।
रास्वपाकी सचिवालय सदस्य सोविता गौतमले यसअघि नै बालेनको नेतृत्वमा नयाँ सरकार बन्ने बताएकी छन् ।
उनले आइतबार चितवनमा पत्रकारहरूसँग भनेकी थिइन्, ‘चुनावभन्दा अगाडि नै पार्टीले बालेनलाई प्रधानमन्त्रीको रूपमा प्रस्तुत गरिरहेको छ । उहाँकै नेतृत्वमा नयाँ सरकार बन्नेछ ।’
नेपालको संविधानको धारा ७६ को उपधारा १ मा बहुमत प्राप्त दलको नेतृत्वमा सरकार गठन हुने व्यवस्था छ ।
धारा २६ को उपधारा १ मा भनिएको छ, ‘राष्ट्रपतिले प्रतिनिधि सभामा बहुमत प्राप्त संसदीय दलको नेतालाई प्रधानमन्त्री नियुक्त गर्नेछ र निजको अध्यक्षतामा मन्त्रिपरिषदको गठन हुनेछ ।’
रास्वपाको एकल बहुमत आउने निश्चित भएकाले अब सरकार बनाउन अन्य व्यवस्थातर्फ जानुपर्ने छैन ।
प्रत्यक्षतर्फ मात्रै पनि रास्वपाले १२४ सिटमा जीत निकालेको छ भने १ सिटमा अग्रता लिइरहेको छ । नेपाली कांग्रेसले १७ सिट जितेको छ भने १ सिटमा अग्रता लिरहेको छ ।
नेकपा एमालेले ८ सिट जितेको छ भने १ सिटमा अग्रता लिइरहेको छ ।
नेपाली कम्युनिस्ट पार्टीले सात सिट जितेको छ । श्रम संस्कृति पार्टीले तीन सिट जितेको छ भने स्वतन्त्र उम्मेदवार महाविर पुनले पनि चुनाव जितेका छन् ।
त्यस्तै राप्रपाले १ सिटमा जित हाल पारेको छ । -पत्रपत्रिकाबाट
