विश्व खबर 
काठमाडौं– चालु आर्थिक वर्षको पहिलो ६ महिनामा (साउन–पुस) सरकारले करिब ५ खर्ब ८१ अर्ब रुपैयाँ राजस्व संकलन गरेको छ । यो रकम कुल लक्ष्यको ८१.७५ प्रतिशत मात्र हो, जबकि पुस महिनामा मात्र १ खर्ब ७१ अर्ब ६३ करोड रुपैयाँ संकलन भएको छ । पुसमा आयकरको प्रथम किस्ता बुझाउने समय भएकाले यस महिनाको लक्ष्य पनि बढी राखिएको थियो ।
पुसमा राजस्व संकलनको लक्ष्य १ खर्ब ९० अर्ब ७७ करोड रुपैयाँ थियो, तर ८९.९६ प्रतिशत मात्रै संकलन भएको मन्त्रालयको तथ्यांक छ । चालु आवको कुल वार्षिक राजस्व लक्ष्य १४ खर्ब ८० अर्ब रुपैयाँ रहेको छ भने अहिलेसम्मको संकलन वार्षिक लक्ष्यको ३९.२८ प्रतिशत मात्र हो । गत आवको तुलनामा राजस्व सामान्य वृद्धि भएको छ – गत आवकै अवधिमा ५ खर्ब ६७ अर्ब रुपैयाँ संकलन भएको थियो, चालु आवमा २.४७ प्रतिशत मात्र वृद्धि भएको छ ।
विशेष गरी आयकर संकलन लक्ष्यभन्दा कम भएको देखिएको छ । पुससम्म आयकर लक्ष्य १ खर्ब ९४ अर्ब थियो, तर १ खर्ब ३८ अर्ब मात्र संकलन भएको छ, जुन लक्ष्यको ७१.११ प्रतिशत हो । गत आवको तुलनामा आयकरमा २.६६ प्रतिशतको गिरावट आएको छ ।
भन्सार महसुल भने गत आवको तुलनामा ८.०८ प्रतिशतले बढेको भए पनि लक्ष्यको ७९.०३ प्रतिशत मात्र संकलन भएको छ । पुस मसान्तसम्म भन्सार महसुलको लक्ष्य १ खर्ब ४६ अर्ब ८३ करोड थियो, तर संकलन १ खर्ब १६ अर्ब मात्र भएको छ । मूल्य अभिवृद्धि करमा ८.३१ प्रतिशत वृद्धि भए पनि लक्ष्यको ९०.१२ प्रतिशत मात्रै उठेको छ । अन्तःशूल्क संकलन पनि लक्ष्यको ९०.०६ प्रतिशत मात्रै पुगेको छ ।
अर्थ मन्त्रालयका अनुसार भन्सार विभाग र आन्तरिक राजस्व विभाग दुवैले लक्ष्यअनुसार राजस्व उठाउन असफल भएका छन् । पुससम्म भन्सार विभागलाई २ खर्ब ८६ अर्बको लक्ष्य दिइएकोमा २ खर्ब ३८ अर्ब मात्र उठाएको छ (८३.३५%), जबकि आन्तरिक राजस्व विभागलाई ३ खर्ब ४४ अर्बको लक्ष्य दिइएकोमा २ खर्ब ७७ अर्ब मात्र संकलन भएको छ (८०.५१%) । वार्षिक वृद्धिदर भन्सार विभागमा ८.४८% र आन्तरिक राजस्व विभागमा २.९९% रहेको छ ।
