विश्व खबर 
काठमाडौं– नेपाली महिला फुटबलकी स्ट्राइकर साबित्रा भण्डारी ‘साम्बा’ नयाँ यात्रा सुरु गर्न न्युजिल्यान्ड प्रस्थान गरेकी छिन् ।
सिजन २०२५–२६ का लागि उनले वेलिङटन फोनिक्स मा आवद्ध हुँदै क्लबको प्रिसिजन क्याम्पमा सहभागी हुन सोमबार त्यसतर्फ प्रस्थान गरेकी हुन् ।
फोनिक्स न्युजिल्यान्डको क्लब भए पनि अस्ट्रेलियामै आधारित ए–लिग वुमन खेल्ने गर्छ ।
आगामी अक्टोबर ३१ बाट सुरु हुने लिगमा १२ मध्ये ११ टोली अस्ट्रेलियाका हुनेछन् ।
साम्बाले प्रस्थानअघि भनिन्, ‘नयाँ यात्राको सुरुवात। नेपाली समर्थकको आशीर्वादका साथ वेलिङटन फोनिक्सबाट खेल्न पाउँदा उत्साहित छु ।’
यसअघि उनले फ्रान्सको शीर्ष लिग क्लब गुइनगाम्प बाट दुई सिजन खेलेकी थिइन् ।
त्यसअघि उनले इसराइलको हापोइल रा’नानामा खेल्दै युरोपियन लिगमा गोल गर्ने पहिलो नेपाली खेलाडी बनेकी थिइन् ।
भारतमा भने उनले गोकुलम केरलासहित तीन सिजन उपाधि जित्दै २४ खेलमा ६० गोल गर्ने कीर्तिमान बनाएकी थिइन् ।
२०१४ मा राष्ट्रिय टोलीबाट डेब्यू गरेकी साम्बाले अहिलेसम्म ६० खेलमा ६६ अन्तर्राष्ट्रिय गोल गरिसकेकी छिन् ।
घरेलु लिगमा उनी एपिएफबाट खेल्दै आएकी छन् ।
