विश्व खबर 
आकाशले हरियालीलाई अँगालो हालेको जस्तो लाग्ने बडिमालिका क्षेत्रको विशाल त्रिवेणी पाटन प्रकृतिको अनुपम उपहार हो ।
बडिमालिका क्षेत्रअन्तर्गत पर्ने त्रिवेणी पाटन, देउरा पाटन, घोडे पाटन, सोता पाटनसहितका २२ वटा विशाल हिमाली पाटनहरू नेपालको सबैभन्दा आकर्षक उच्च हिमाली घाँसे मैदानहरूमध्ये गनिन्छन् ।
समुद्री सतहबाट हजारौँ मिटर उचाइमा फैलिएका यी पाटनहरूले प्रकृतिको भव्यता र हिमाली सौन्दर्यलाई जीवन्त बनाएका छन् ।
वर्षायामसँगै हरियो मखमली घाँसले ढाकिएका फाँटहरू, क्षितिजसम्म फैलिएको खुला आकाश, चिसो हिमाली हावा र टाढासम्म देखिने हिमशृंखलाले यहाँ पुग्ने जो–कोहीलाई मन्त्रमुग्ध बनाउँछ ।
प्रत्येक पाटनले फरक–फरक दृश्य, सुगन्ध र अनुभूति बोकेको छ, जसले प्रकृतिप्रेमी, तीर्थयात्री र पर्यटक सबैलाई समान रूपमा आकर्षित गर्छ ।
यी पाटनहरू केवल हरिया घाँसे मैदान मात्र होइनन्; यहाँ हिमाली जैविक विविधता, पशुपालनको परम्परा, स्थानीय संस्कृति, धार्मिक आस्था र अपार पर्यटन सम्भावना एकसाथ जीवित छन् ।
प्रकृतिको काखमा बिताएको प्रत्येक क्षणले मानिसलाई आफू प्रकृतिको विशाल सृष्टिको सानो अंश मात्र भएको अनुभूति गराउँछ ।
बडिमालिकाका यी पाटनहरू कुनै साधारण गन्तव्य होइनन्, यी त प्रकृतिसँग आत्मीय संवाद गर्ने स्थल हुन् ।
यहाँ पुग्ने हरेक यात्रुले सम्झनामा बोकेर फर्किने कुरा केवल दृश्य होइन, जीवनभर ताजा रहने एउटा अनुपम अनुभूति हो ।
–हिमालयन भट्ट (शब्द/तस्बिर)
