विश्व खबर 
काठमाडौं– उत्तर कोरियाले बिहीबार जापान सागरतर्फ कम्तीमा एउटा अज्ञात क्षेप्यास्त्र प्रहार गरेको दक्षिण कोरियाली सेनाले जनाएको छ ।
जापानले पनि सम्भावित ब्यालेस्टिक क्षेप्यास्त्र प्रक्षेपण भएको पुष्टि गर्दै निगरानी गरेको बताएको छ ।
जापानको रक्षा मन्त्रालयका अनुसार प्रक्षेपणबाट जापान आसपासका क्षेत्रमा कुनै प्रत्यक्ष असर परेको छैन ।
यो घटना उत्तर कोरियाले जापानमाथि सैन्य उपस्थिति विस्तार गरी क्षेत्रीय तनाव बढाएको आरोप लगाएको भोलिपल्ट भएको हो ।
उत्तर कोरियाली नेता किम जोङ उनकी बहिनी किम यो जोङले जापानको बदलिँदो सुरक्षा नीतिका कारण प्योङयाङले थप सैन्य विकल्प विकास गर्ने चेतावनी दिएकी छन् ।
उता जापानले आफ्नो रक्षा नीति आत्मरक्षामा आधारित रहेको स्पष्ट पारेको छ ।
विश्लेषकहरूका अनुसार उत्तर कोरिया र रूसबीच आर्थिक तथा सैन्य सहकार्य अझ सुदृढ हुँदै गएको छ ।
कोरियाली युद्ध शान्ति सन्धिबिना केवल युद्धविराममा टुंगिएकाले उत्तर र दक्षिण कोरिया अझै प्राविधिक रूपमा युद्धकै अवस्थामा रहेका छन् ।
