विश्व खबर 
काठमाडौं– अमेरिकी राष्ट्रपति डोनल्ड ट्रम्प क्यालिफोर्नियाको लस एन्जलस क्षेत्रस्थित आफ्नै गल्फ कोर्समा आयोजित चन्दा सङ्कलन कार्यक्रममा पुग्नुअघि त्यहाँ नजिकै हतियारसहित एक सन्दिग्ध व्यक्ति पक्राउ परेका छन् ।
लस एन्जलस प्रहरीले ३८ वर्षीय जनीन जोन टीएललाई आइतबार नियन्त्रणमा लिएको हो ।
उनी गल्फ कोर्स वरपर घुम्दै फोटो तथा भिडिओ खिचिरहेको र सुरक्षा गतिविधि निगरानी गरिरहेको जस्तो देखिएको प्रहरीले जनाएको छ ।
उनको साथबाट पेस्तोल, अवैध होलो–पोइन्ट गोली, उच्च क्षमताको म्याग्जीन तथा अन्य हतियारसम्बन्धी सामग्री बरामद भएको बताइएको छ ।
पछि घरमा गरिएको खानतलासीमा परिमार्जित एआर राइफल, अर्को पेस्तोल, बुलेटप्रुफ ज्याकेट, थप गोली र नोटबुकसमेत फेला परेको अधिकारीहरूले बताएका छन् ।
एफबीआई र यूएस सीक्रेट सर्भिसको सहयोगमा अनुसन्धान जारी छ ।
हालसम्म ट्रम्पलाई लक्षित गर्ने स्पष्ट योजना पुष्टि नभएको र सन्दिग्धमाथि ट्रम्पलाई हानि पुर्याउने अभियोग भने लगाइएको छैन ।
