विश्व खबर 
काठमाडौं– अमेरिकी राष्ट्रपति डोनाल्ड ट्रम्पले इरानसँग वार्ता भइरहेको र पाँच महिनादेखि जारी युद्ध अन्त्य गर्न तेहरानका लागि यो ‘अन्तिम मौका’ भएको दाबी गरेका छन् ।
उनले इरानी अधिकारीहरूले सम्भावित सैन्य कारबाहीको जानकारी पाएपछि आफूलाई सम्पर्क गरेको समेत बताएका छन् ।
तर इरानले अमेरिकासँग कुनै प्रत्यक्ष वार्ता नभएको स्पष्ट पार्दै ट्रम्पको दाबी अस्वीकार गरेको छ ।
इरानी विदेश मन्त्रालयले ओमानसँग होर्मुज जलमार्गको व्यवस्थापनबारे मात्रै छलफल भइरहेको जनाएको छ ।
सन् २०२६ फेब्रुअरीमा अमेरिका र इजरायलले इरानका सैन्य तथा आणविक केन्द्रमा आक्रमण गरेपछि सुरु भएको तनाव अझै कायम छ ।
ट्रम्पले होर्मुज जलमार्ग खोल्ने र त्यसपछि आणविक कार्यक्रमबारे वार्ता गर्ने प्रस्ताव राखे पनि इरानले युद्ध अन्त्यलाई प्राथमिकता दिएको छ ।
विश्लेषकहरूका अनुसार दुवै पक्षको कडा अडान र विरोधाभासी बयानबाजीका कारण तत्काल कूटनीतिक समाधानको सम्भावना कमजोर देखिएको छ ।
