विश्व खबर 
काठमाडौं– देशका प्रमुख राजनीतिक दलहरू यतिबेला आन्तरिक विवादमा अल्झिएका छन् ।
झन्डै दुईतिहाइ बहुमतसहित सरकारको नेतृत्व गरिरहेको राष्ट्रिय स्वतन्त्र पार्टी (रास्वपा) मा सभापति रवि लामिछाने र प्रधानमन्त्री बालेन्द्र शाहबीच दूरी बढेको चर्चा छ ।
मन्त्री चयन, पार्टी नेतृत्व र संसदीय व्यवस्थापनलाई लिएर अविश्वास बढ्दै गएको बताइन्छ ।
नेपाली कांग्रेस विशेष महाधिवेशनपछि स्पष्ट दुई धारमा विभाजित भएको छ ।
नयाँ नेतृत्वलाई आयोग र अदालतले मान्यता दिएपछि पुरानो पक्ष असन्तुष्ट छ र अलग राजनीतिक अभ्यासको तयारीसमेत गरिरहेको संकेत देखिएको छ ।
एमालेमा चुनावी हारपछि अध्यक्ष केपी ओलीको नेतृत्वमाथि प्रश्न उठ्न थालेको छ ।
प्रदेश सरकार गठन र नेकपासँगको सत्ता सहकार्यले पार्टीभित्र असन्तुष्टि बढाएको छ ।
कोसी प्रदेशको नेतृत्व विवाद अझै टुंगिएको छैन ।
नेकपाभित्र पनि एमालेसँगको सहकार्यलाई लिएर माधव नेपाल र झलनाथ खनालजस्ता नेताहरू असन्तुष्ट छन् ।
दोस्रो पुस्ताले पुराना शीर्ष नेताहरूले नेतृत्व छाड्नुपर्ने माग दोहोर्याइरहेको छ ।
राप्रपामा पनि नेतृत्व र मूल एजेन्डालाई लिएर मतभेद चर्किएको छ ।
धवलशमशेर राणालगायत केही नेताले पार्टी छाडिसकेका छन् भने कमल थापासँगको एकीकरण अझै पूर्ण हुन सकेको छैन ।
यता जसपा नेपाल, जनमत पार्टी, आम जनता पार्टीलगायत सात साना दलले साउन २३ गते ‘अग्रगामी मोर्चा’ घोषणा गर्ने तयारी गरेका छन् ।
देशको राजनीतिक केन्द्र यतिबेला लगभग सबै दलमा बढ्दो आन्तरिक किचलो र पुनर्संरचनाको बहसतर्फ केन्द्रित देखिएको छ ।
