विश्व खबर 
काठमाडौं– नेपाल प्रहरीको केन्द्रीय अनुसन्धान ब्युरो (सीआईबी)ले व्यवसायी तथा गैरआवासीय नेपाली उपेन्द्र महतोसँग बयान लिँदै विदेशी मुद्रा अपचलन, स्रोत नखुलेको धनको कारोबार, एनसेलको सेयर खरिदबिक्रीमा भएको भनिएको जालसाजी तथा पुँजीगत लाभकर छलीबारे अनुसन्धान थालेको छ।
अनुसन्धानको केन्द्रमा एनसेलको २० प्रतिशत सेयर बिक्रीबाट उत्पन्न हुन सक्ने पुँजीगत लाभकर रहेको बताइएको छ। आयकर ऐनअनुसार कर दायित्व उत्पन्न भएको हो वा होइन भन्ने विषयमा सम्बन्धित निकायले परीक्षण गरिरहेको छ।
यससँगै टेलियासोनेराले एक्सियाटालाई हस्तान्तरण गरेको ८० प्रतिशत सेयरबाट सम्भावित कर दायित्व पनि अलग्गै रूपमा उठाइएको छ। यी दुई विषयलाई कानुनअनुसार छुट्टाछुट्टै परीक्षण गर्नुपर्ने माग लामो समयदेखि हुँदै आएको छ।
महालेखापरीक्षकको २०७३ सालको प्रतिवेदनले एनसेल सेयर कारोबारसँग सम्बन्धित करिब ६ अर्ब रुपैयाँ कर, ब्याज र अन्य दायित्व असुल गर्नुपर्ने उल्लेख गरेको थियो। समयसँगै ब्याज र जरिवाना थपिँदा यो दायित्व करिब १२ अर्ब रुपैयाँसम्म पुग्न सक्ने अनुमान गरिएको छ।
सीआईबीले प्रभावशाली व्यक्ति र ठूला आर्थिक कारोबारसमेत अनुसन्धानको दायरामा ल्याउन थालेको संकेतका रूपमा यो घटनालाई हेरिएको छ। अनुसन्धान निष्पक्ष र प्रमाणमा आधारित रूपमा अघि बढेमा यसले कर प्रशासन, सुशासन र विधिको शासनप्रतिको जनविश्वास बलियो बनाउन सक्ने अपेक्षा गरिएको छ।
