विश्व खबर 
काठमाडौं– अन्तर्राष्ट्रिय मानवअधिकार संस्था ह्युमन राइट्स वाच (एचआरडब्लु)ले मध्य मालीको किर्निया गाउँमा गत जुन १५ मा रूसी समर्थित अफ्रिका कोप्र्सले गरेको हवाई आक्रमणमा तीन बालबालिकासहित आठ सर्वसाधारणको मृत्यु भएको जनाएको छ ।
संस्थाका अनुसार रुसी सुखोई सु–२४ विमानबाट खसालिएका दुई बममध्ये पहिलो गाउँ प्रमुखको घर नजिक र दोस्रो गाईवस्तु बजार क्षेत्रमा विस्फोट भएको थियो ।
एचआरडब्लुले घटनाबारे १९ जनासँग अन्तर्वार्ता, उपग्रह तस्बिर र अफ्रिका कोप्र्सले सार्वजनिक गरेको भिडियो विश्लेषण गरेको बताएको छ ।
संस्थाले आक्रमणमा कुनै इस्लामिक विद्रोही मारिएको प्रमाण नपाएको दाबी गर्दै माली सरकारसँग स्वतन्त्र अनुसन्धान र दोषीमाथि कारबाहीको माग गरेको छ ।
एसोसिएटेड प्रेसले भने उक्त दाबी स्वतन्त्र रूपमा पुष्टि गर्न नसकेको जनाएको छ ।
रूसको रक्षा मन्त्रालयले पनि यसबारे तत्काल कुनै प्रतिक्रिया दिएको छैन ।
मालीमा अल–कायदा र इस्लामिक स्टेटसँग आबद्ध सशस्त्र समूह तथा तुआरेग विद्रोहीहरूको हिंसा जारी रहेको छ ।
सन् २०२१ यता रूसी सैनिक तथा पछिल्लो समय अफ्रिका कोप्र्स मालीको सैन्य अभियानमा सक्रिय छन् ।
