विश्व खबर 
धनगढी– सुदूरपश्चिम प्रदेशमा नयाँ सरकार गठनको तयारी भइरहेका बेला सबैभन्दा ठूलो दल नेकपाभित्र आन्तरिक किचलो चर्किएको छ ।
एमाले–नेकपा भागबण्डाअनुसार प्रदेश सरकारको नेतृत्व नेकपाले गर्ने सहमति भएको छ र संसदीय दलका नेता खगराज भट्ट मुख्यमन्त्री बन्ने सम्भावना बलियो मानिएको छ ।
तर, साविक माओवादी केन्द्रभित्रको पुरानो शक्ति संघर्ष फेरि सतहमा आएको छ ।
मानबहादुर धामी पक्षले भट्टलाई दल नेताबाट हटाएर आफूलाई मुख्यमन्त्री बनाउने प्रयास गरेको स्रोतको दाबी छ ।
धामी पक्षले साविक नाउपा र एकीकृत समाजवादीका सांसदसँग पनि समर्थन खोजे पनि बहुमत जुटाउन नसकेपछि उक्त प्रयास रोकिएको बताइएको छ ।
दल नेता परिवर्तनको सम्भावना कमजोर बनेपछि अहिले मन्त्री पदको बाँडफाँडलाई लिएर नेताहरूबीच तीव्र दौडधुप सुरु भएको छ ।
साविक नाउपाले दुई मन्त्री र एक राज्यमन्त्रीको माग राखेको छ भने एकीकृत समाजवादीले पनि सम्मानजनक सहभागिता चाहेको जनाएको छ ।
यता नेकपाका उपनेता प्रकाश रावलले भने पार्टीभित्र कुनै गम्भीर समस्या नरहेको दाबी गरेका छन् ।
शीर्ष नेताहरूबीच संवाद जारी रहेको र मुख्यमन्त्री कमलबहादुर शाहले मार्ग प्रशस्त गरेपछि केन्द्रको सहमतिअनुसार नयाँ सरकार गठन प्रक्रिया अघि बढ्ने उनले बताएका छन् ।
