विश्व खबर 
काठमाडौं– अमेरिकी राष्ट्रपति डोनाल्ड ट्रम्पले हमास र गजाका अन्य सशस्त्र समूह गजाको शासन छाड्न तथा निःशस्त्रीकरण गर्न सहमत भएको दाबी गरेका छन्।
ट्रम्पले ट्रुथ सोसलमार्फत कतार, टर्की र इजिप्टको मध्यस्थतामा भएको वार्तापछि ऐतिहासिक सहमति भएको बताएका हुन्।
प्रस्तावित सहमति अनुसार हमास गजाको प्रशासनबाट बाहिरिने र नयाँ प्राविधिक निकायले शासन सम्हाल्नेछ।
निःशस्त्रीकरण प्रक्रिया करिब ९ महिनामा चरणबद्ध रूपमा पूरा गर्ने योजना रहेको अन्तर्राष्ट्रिय सञ्चारमाध्यमहरूले जनाएका छन्।
तर अल जजिराका अनुसार हमासले इसराइली सेना गजाबाट नफर्केसम्म र आफ्ना सर्त पूरा नभएसम्म हतियार नबुझाउने बताएको छ।
हमासका प्रतिनिधि गाजी हमादले तत्काल निःशस्त्रीकरणमा सहमति नभएको स्पष्ट पारेका छन्।
सम्झौताको कार्यान्वयन अझै अनिश्चित देखिएको छ भने इसराइलले हालसम्म कुनै औपचारिक प्रतिक्रिया दिएको छैन।
