विश्व खबर 
काठमाडौं– नेपालमा लगातार तीन महिनादेखि मासिक दुई खर्ब रुपैयाँभन्दा बढी रेमिटेन्स भित्रिएको छ ।
नेपाल राष्ट्र बैंकका अनुसार चालु आर्थिक वर्ष २०८२/८३ को ११ महिनामा (साउन–जेठ) कुल २१ खर्ब २० अर्ब रुपैयाँ रेमिटेन्स भित्रिएको छ ।
जेठमा २ खर्ब ३ अर्ब, वैशाखमा २ खर्ब ५७ अर्ब र चैतमा २ खर्ब ९ अर्ब रुपैयाँ रेमिटेन्स प्राप्त भएको थियो ।
गत आर्थिक वर्षको सोही अवधिमा १५ खर्ब ४१ अर्ब रुपैयाँ रेमिटेन्स आएको थियो ।
पछिल्ला करिब साढे दुई वर्षदेखि मासिक एक खर्ब रुपैयाँभन्दा बढी रेमिटेन्स निरन्तर भित्रिँदै आएको राष्ट्र बैंकले जनाएको छ ।
समीक्षा अवधिमा १० अर्ब ८९ करोड रुपैयाँ रेमिटेन्स विदेशतर्फ पठाइएको छ, जुन गत वर्षको यही अवधिको ९ अर्ब ८७ करोड रुपैयाँ भन्दा बढी हो ।
यस्तै, वैदेशिक रोजगारीमा जानेको संख्या ५.४५ प्रतिशतले घटेको छ ।
११ महिनामा नयाँ तथा पुनः श्रम स्वीकृति लिनेको संख्या ७ लाख १८ हजार पुगेको छ, जबकि गत वर्ष यही अवधिमा ७ लाख ६० हजार जनाले श्रम स्वीकृति लिएका थिए ।
इरान–इजरायल द्वन्द्वका कारण केही समय वैदेशिक रोजगारी प्रभावित भएकाले श्रम स्वीकृति लिनेको संख्या घटेको राष्ट्र बैंकले जनाएको छ ।
